وردنا الى مدونة الجمرة مداخلة من العبد الفقير عن الحياة في سوريا و اليكم ما قاله:
بيخطرلي أحياناً كتير أسئلة و ما كنت عم اقدر جاوب عليها بس مؤخراً صار عندي تصور بسيط للأسباب و الأجوبة ورح شاركك فيها.
ليش الله خلقني؟ مشان اعبدو؟ طيب نظرية جميلة مدعومة بالكتب السماوية. طيب، ليش خلقني في عائلة فقيرة و غير متنفذة؟ يجوز ليختبر إيماني وصبري، أيضاً نظرية مدعومة من الكتب السماوية. طيب آمنت و صدقت، بس ليش خلقني فقير و بسوريا؟ سوأل صعب، و فكرت فيه كتير و ما طلع معي غير إجابة وحدة و للأسف غير مدعومة سوى بفلسفتي كإنسان بسيط.
سيدي، لقد خلقني فقير و بسوريا مشان يزداد إيماني بالخالق و يعطيني الطريق السهل للجنة و كما يلي تفسير العبد الفقير:
الإنسان يلي عايش بسوريا ازداد إيمانه لكثير من الأسباب، تتعجب كيف سوريا ما تزال تمشي و ما فيها نظام سوى النظام الأمني؟ تتعجب كيف سوريا عندها كل هذا الكم الهائل من موظفي الدولة الذي لا فائدة لهم بالمرة ما زالت تمشي؟ تتعجب كيف الاقتصاد محتكر من الأقلية المنتفعة (أقرباء و أصدقاء القائد) و مازالت تمشي؟ بتستغرب أنو في سوريا عندك الفساد من أكبر راس لحد أصغر راس و لسى تمشي؟ بتستغرب كيف الناس ما معها تأكل و لسى إلها نفس تتزوج و تحافظ على النسل و تجيب أجيال جديدة تعيش بالمرارة ذاتها يلي عايشتها؟ بتستغرب كيف طلع بالبلد في سلفيين و خلايا إرهابية و ما شفناها بحياتنا لوقت ما صار في مظاهرات؟ بتستغرب كتير شغلات بها البلد، وباعتبارك في سوريا فأنت على الأغلب عاطل عن العمل وأيضاً أنت لا تستطيع التحدث عن هذه التساؤلات في العلن، بالتالي تملك الكثير من الوقت مع نفسك لتفكر و لتحاول فهم هذه المعضلة و لتصل الى حل واحد فقط: الله موجود و الإيمان واجب و اللي بقلك غير هل الحكي خليه يفسر كل هي الظواهر الخارجة عن الطبيعة! شكراً لك يا ربي و انشالله كون نجحت بإمتحان الإيمان لأني بصراحة رسبت بإمتحان الحياة و ياريت تآخد أمانتك وتريح عبدك الفقير.
