على هامان يا فرعون ؟

و هكذا ، و بدون سابق انذار ، تحول رامي مخلوف الى قديس يريد مساعدة فقيرو الحال من درعا الى دير الزور ، على ذمة سيريا نيوز طبعا..

هدول نفسهم - فقيرو الحال من درعا الى دير الزور يعني- يللي ولاد عمتو بشار و ماهر قصفوهم و لعنو سلسفيل اجدادهم ايام المظاهرات..

و هدول كمان نفسهم - هون صرنا عم نحكي عن أهل درعا و بس - يللي قرايبو عاطف نجيب أجرم فيهم سنين و سنين..

و هدول نفسهم - أما هونو فلح نحكي عن أهل دير الزور- يللي عادل سفر - رأيس حكومة ابن عمته - رجع منطقتهم الشرقية ميتين سنة ضوئية لورا لمّا كان وزير زراعة..

 هدول نفسهم - و هلأ صار دور أهل حمص - يللي اياد غزال ، المحافظ السابق العتيد و رفبق ابن عمتو بالمدرسة ، نهبهم لحتى ما خلى فرنك بجيبة العالم ما هرفو..

و كمان هدول نفسهم - و ختامه مسك بأهل حماه - يللي خالو حافظ و أخو رفعت عملو فيهم شي بيخللي هتلر يطلع طالب ابتدائي قدامهم..

و بعد كل هاد الك عين تحكي بالأعمال الخيرية؟؟ شو مفكر حالك أسماء الأخرس الأسد ولاه؟

خطاب تالت...وأخيراً؟

بعد ما طال علينا صمتو، أشاعت بعض المواقع أن السيد الرئيس رح يخرج علينا بخطاب ثالث متلفز (ومدبلج ومؤدلج ومفلتر). ومتل عادة الجمرة، تحرّت أسباب استجماع سيادتو الشجاعة لإلقاء ما يعتبره الكثيرون خطاب الوداع، فتبين لنا أنو الدافع الرئيسي كان مجموعة من المؤيدين اللي تجمعوا تحت قصرو وغنّولوا:
نحنا عبيدك يا بيشو...سمّعنا خطاب رنان
ما بتهمنا الحرية...وما منريد غير الأمان
فكان لهل كلمات أثر السحر على سيادتو مما دفعو إلى الحماس الشديد لأنو يعمل الشي الوحيد اللي كل العالم قلولوا أنو شاطر فيه ألا وهو الخطاب (اللي يمكن وصفو بشكل أفضل بكلمة علاك ومصدّي كمان).

قصيدة مهداة لدرعا وأخواتها من المدن الثائرة

الكاتب صديقة الجمرة: شاعرة الوطن

دمُ درعا شقائق النعمانٍ.........غنّ يا قلبُ واستفض يا بيانِ

يوم هبّت تكسِر الصنم الباغي.........فتهوي بقية الأوثان

بشبابٍ ثاروا انتصاراً لشعب.........فاستردّوا كرامة الإنسان

يتبارون للفداء سراعاً.........ما رأينا من بينهم متواني

واستفاقت دمشق غضبةَ شعبٍ.........ثائرٍ هبّ لم يكن بالجبان

إنها الشام حين تغضب لا.........يصمد في وجهها عتلٌ جاني

لبّت اللاذقية اليوم درعا.........تنفض الذلّ بعد طول هوانِ

فالأباةُ الأباةُ فيها تنادوا.........بشبابٍ من أشجع الشجعان

وتهاوى الرصاصُ يحصد شعباً.........قد تحدّى ضراوة العدوان

لم يبالوا الردى فكانوا جميعاً.........كقلاعٍ قوية البنيان

كل تكبيرةٍ تولِدُ رعباً.........في صدور الطغاة في كل آن

حلمٌ واحدٌ أفاقوا عليه.........أشعلوا ثورة على الطغيان

ثورةً للشباب تضرى وتضرى.........إن شعباً يثورُ ليس بفانِ

نصحية حصرية للمدن السورية

الكاتب صديق الجمرة: سوريا حرة
لتجنب دخول دبابات الجيش السوري العظيم ننصحكم, ليس بايقاف المظاهرات والمتظاهرين, بل بتغيير اسم المدينة ليصبح الجولان, حيث أن التجارب أثبتت بما لا يقبل الشك أن دباباتنا تمتاز بلا جاذبية مفرطة منذ 48 سنة تجاه منطقة الجولان.

ملاحظة: النصيحة قابلة للتطبيق على اي محافظة, بلدة, قرية أو منطقة.

معلومات أمنية

هل تعلم:
أن في سوريا أكثر من أربعة عشر فرع أمن؟
أن المواطن السوري عندما يخفتي يكون في أحد أقبية المخابرات؟
أن المواطن السوري يخرج من أقبية المخابرات السورية إما عضو خلية إرهابية (إن اعترف) أو قتيل (إن لم يعترف)؟
أن أجهزة الأمن معصومة عن المحاسبة مهما ارتكبت من جرائم؟


أن أصغر عنصر أمن له سطوة على أعلى ضابط في الجيش؟
أن عناصر الأمن يمتهنون جميع وظائف الدولة من عامل التنظيفات إلى دكتور في الجامعة؟
أن عنصر الأمن يرتقي منصبه كلما انحطت أخلاقه؟
أن أكبر منصب أمني هو رئيس الجمهورية؟
أنك إذا كنت تعلم أي من المعلومات السابقة فإما أنك أو أحد أقربائك أو معارفك سجين سياسي سابق أو عنصر أمني؟

فيسبوكية معدلة من قبل الجمرة

أسئلة متوقعة لفحص التاريخ: 
1- رتب الإمارات التالية بحسب استقلالها ابتداء من الأقدم: (إمارة حمص- إمارة درعا- إمارة بانياس- إمارة تلكلخ) 
2-إلى أي إمارة ينتسب الأمير أنس عيروط؟ 
3- تحدث باختصار عن محادثات بندر- خدام 
4- عدد واشرح العمليات التي قام بها مجاهد الكيف السلمي أب نظيير - ربي ييسر
5- كم كان تعداد جيوش الشبيحة التي خاضت حرب إمارة درعا البلد؟
6- ما هي الإمارة التي اشتهرت بتصنيعها راجمة بوري الصوبيا؟
7- من قام بإزالة تمثال الرئيس الأب من إمارة حماة؟
8- تحدث بما لا يزيد على مليون كلمة عن نظرية المؤامرة السلفية البندرية الخدامية الإخوانية الرفعتية
9- أكمل النشيد السلفي التالي الذي رددته كافة الإمارات السلفية: يا ماهر ويا جبان ...
10- رتب الأسلحة السلفية التالية حسب قدرتها التدميرية: (تكبير - حرية - سلمية - شعب)

روح خيّط بغير هل المسلّة

أنا و من طول عمري ما بعرف كّون أصدقاء. الكل بيعتبرني عدوه.. أحياناً بتطّلع بالمراية و بقول لحالي: لعمى, ليش؟ معقول أنا الصح و الكل غلط؟ طيب حتى الطرفين بينسوا المشلكة و بينزلوا فيني.. بيقولوا عدو عدوّي صديقي. كيف ممكن لشخص أنو يكون على خلاف مع الطرفين في نزاع؟ على كل حال ممكن تعرفوا الجواب بعد نهاية هل التدوينة..

د بشّار الأسد: لأسباب عديدة جدّاً و ما رح حاججك إلّا بأبسطها و هو أنك عامل مسكين. اذا سلّمنا جدلاً بصحة النظريّة فأنت لست على قدر حمل الرّئاسة في سوريا و لذلك بقلّك: روح خيط بغير ها المسلّة.

رجب طيب أردوغان: شاطر بالكلام و الوعيد. يعني بصراحة متل النظام السوري. ووصلت المواصيل لعنّا و صرت جاهز أنت و نظامك للتدخل عسكريّاً في سوريا!! كنت حبّك و لكن كلشي بيناتنا انتهى لأنو سوريا صعبة عليك و مشاكلنا منحلّا بين بعض و بلا سلاحك و لذلك بقلّك: روح خيّط بغير ها المسلّة.

السيّد حسن نصر الله: رجل و اللي بقول غير هل الكلام غلطان. بس لا تنسى يا سيد أنَّ من يدعمك و يحتضن مقاومتك هو الشعب السوري و ليس النظام وحده. الشعب كان يحبك بكل طوائفه و أطيافه و لكن  عندما لا تترحم على قتلى الشعب و تسأل أين هم الشعب السوري و تحتكم لأجندة المصلحة الذاتية و الآنيّة بقلّك: روح خيّط بغير ها المسلّة.

الشيخ عدنان العرعور:

سيادتو مو كفو

كان في شب بيلدغ بحرف السين وبيلفظوا ثين. وبيوم من الأيام كان ماشي بالطريق راح وقع بجورة من جور البلدية. المهم هادا بلش يصرخ: ثاعدوني، ثاعدوني. وهيك وإذ به بشار ماشي بالطريق وبيسمع صراخو للشب فبروح لعندو وبقلو: ثلامتك ثلامتك. ومدّلو إيدو. قام هداك الشب وقت سمعوا لبشار هيك عم يحكي فكرو عم يتمسخر عليه وقلو: عم تتمثخر عليي، الله يلعنك إنت واللي بيعتمد عليك.
العبرة: هالزلمة حتى لو حاول يساعد ما خرجو لأنو ما معبي المنصب.

خدني جيتك

سيدة أربعينية من حمص: أهل الشام خانونا.. كنا متوقعين منكم أكتر من هيك .. قال عاصمه قال... ليكو قبضايات حمص .. تحت الضرب و الرصاص و لساتهم عم يتظاهروا..

سيدة خمسينية من دمشق: يوه.. والله يلي بيسمعك بيقول إنو الشام ما عملت شي.. نسيتي إنو أول مظاهرة طلعت عنا بلشام؟ وين كانوا رجالكم يا حبيبتي؟

سيدة أربعينية من حمص: إيه حاجي عاد.. أهل حمص عايشين تحت الدبابات و القناصين، و انتو بالشام عم تطلعوا و تسهروا كل يوم ولا على قلبكم هم..

سيدة خمسينية من دمشق: إيه لأى حبيبتي.. إيه والله دبحونا المخابرات كابتين على نفسنا ما عم نسترجي نتلحفظ.. إذا انتو السلاح بوجكم نحنا السلاح بضهرنا.. و أصلاً نص شبابنا صارو بالحبس..

سيدة أربعينية من حمص: والله يلي بيسمعك بقول إنو فايته طالعة على اجتماعات الثورة.. دخيلكم أهل الشام شو اكلين مقلب بحالكم.. عدلك كم واحد من حمص صار محبوس لهلق؟

سيدة خمسينية من دمشق: إيه كنتي ورجيني عضلاتك و انزلي علشارع بحمص لو كنتي شاطرة.. بس الحكي ما عليه رباط.. والله و صار يطلع صوتكم يا أهل حمص..

و يستمر هذا النقاش المحتدم الذي حدث في مطعم فرنسي في الجاده الخامسه في نيويورك بين زوجتا طبيبين لم يزورا البلد منذ سنين .. و يحتدم و يحتد و يتحول إلى سلسلة من الاتهامات الطائفيه و العشائرية...
و ينتهي بدفع غاضب للحساب بستخدم بطاقة فيزا البلاتينيه..

و في نفس هذا الوقت، هتف شباب حمص لأهل الشام، و تظاهر شباب الميدان و ركن الدين لنصرة الرستن و تلبيسه
و إعتصم أهل اللاذقيه لنصرة جسر الشغور و تظاهر أهل حماه لنصرة درعا
و أعاد الجيل الشاب كتابة أصول التعامل بين مدن بلد واحد، فرقتها أربعون عاماً من الطائفية المنهجية
و بدأت أغصان يانعة سورية جديدة تشق التراب باتجاه ضوء شمس لم تراه من سنين طويلة

*قصة شبه حقيقية ، مع تصرف بالأحداث و بعض الدراما و البهارات...

صورة بدون تعليق

طالب ابراهيم والحديث الكوني

ثقب أسود على شكل خريطة سوريا

دار الحديث التالي بين أستاذي فيزياء خرجا لتوهما من صدمة مشاهدة مقابلة مع من يعرف بـ الجلطة أو محطم العقول، أحد أكبر فورفوزيلات النظام السيد طالب ابراهيم:
الأول: ما عم صدق أدنيي، لازم نضفون من الشحم. عن جد هالمجنون عم يهدد تركيا؟
التاني: أوف، ما طبيعي، عن جد؟ كل يوم بتفاجأ أكتر بسلوك النظام.
الأول: في شخص اسمو مورفي معرّف مجموعة من القوانين الغريبة ومنها قانون بينطبق على نظامنا: بعمرك ما تستخف بغباء الإنسان.
التاني: العالم أينشتاين عندو متل أحسن: "شيئين غير محدودين: الكون وغباء الإنسان؛ ولست واثقاً بعدم محدودية الكون". بناء عليه أنا بظن أنو غباء هالنظام غير محدود.
الأول: ممكن نطبق نظرية الأوتار الفائقة على هالنظام، لأنو بتعبر عن مفهوم أكبر من غير المحدودية.
التاني: ليش نحنا عنا توصيف لشي أكبر من غير المحدود؟
الأول: الثقب الأسود.
التاني: بس الثقب الأسود هو غير محدود.
الأول: ما حذرت، هالمفهوم أكبر من غير محدود، هو ثقب أسود.
التاني: فهمان عليك، بس أنا برأيي أنو الثقب الأسود غير محدود.
الأول: الثقب الأسود بينتج عن نظام بينهار على نفسو داخليا، وهادا الشي اللي عم يصير حالياً مع النظام، اقتنعت إلا إشرحلك أكتر؟.
الثاني: لا اقتنعت، بس الله يستر ما يبلعنا الثقب الأسود الناتج عن انهيار هالنظام.

ما الذي ستفعله الوزارة الجديدة (من أرشيف الدومري السوري)

الكاتب: الدومري السوري

في كل مرّة (يضوج) و(يغلي) فيها الشارع إلى درجة كبيرة، يبدأ إعلامنا الرسمي بتسريب أنباء عن تشكيل وزارة جديدة....كنوع من أنواع الإبر المهدئة .
وفي كل مرّة تنطلي هذه الحيلة على شعبنا. فيهدأ من جديد، ولا تتغير الوزارة.
لكن هذه المرة قررت أن أصدقهم لأن (التالته سبّاته).
فما الذي ستفعله الوزارة الجديدة؟

أول مهام السادة الوزراء الجدد عادة" هو حقن وجوههم بعدد من المواد السامة، منها مادة "الزرنيخ" لشلّ العضلات المسؤولة عن تقديم البسمة للمواطن، ومادة "الكَرّب" لشلّ العضلات المسؤولة عن سماحة الوجه، ومادة "خوش ضمير" لتعطيل أعصاب الرأس المسؤولة عن الإحساس بمعاناة المواطنين.
يلي ذلك تناول بعض الفيتامينات الخاصة مثل فيتامين (ل) لتقوية حالة "اللؤم" لديهم، وفيتامين (ش) الذي يجعلهم "شقفة واحده"، وفيتامين (ن) للنفاق أمام المعلم.

بعد ذلك، وكما جرت العادة، يغيرون فرش مكتبهم فورا"، خوفا" من أن يكون الوزير السابق مصاب بمرض جلدي معدي.
يلي ذلك تغيير مدير المكتب، والسيارة، وكمشة موظفين محسوبين على الوزير السابق.
ومن ثم يتوجهون لأخذ مباركة رؤساء الأفرع الأمنية الرئيسية وطمأنتهم أن الوزارة وزارتهم.

ومن بعدها تبدأ المصائب....
تصريحات، وتعليكات، ومقابلات تلفزيونية مليئة بـ سوف، وربما، وقريبا"، وتوجيهات، وغيره من كلام تمّ دفنه مع لينين وستالين.
ويبدأ من جديد وضع أحجار الأساس، وقصّ الشرائط، والإشادة بالسياسات الحكيمة، والخطابات التاريخية. ويتم ترتيب المؤتمرات التي تنعقد تحت شعارات لا علاقة لها بالمؤتمر، وتبدأ ورشات العمل الغير قادرة على إصلاح حتى (دولاب سيارة).
ويطلعون علينا من كل شباك مفتوح ليقولوا أنهم مهتمون بتحسين أوضاعنا، لدرجة أنني بدأت بالإعتقاد أنه هنالك فعلا" شخص إسمه (تحسين أوضاعنا) يلقى اهتمام كافة الوزارات المتعاقبة.

وبعد أن يتأقلموا مع الجو، يبدأ البحث عن الرزقة.
فعلى سبيل المثال لا الحصر، هذا الذي يستورد باصات من الأمازون، وذاك الذي يقبض المعلوم لإستصدار قرار يطيح بدكتورة نزيهة في وزارة الصحة، لأنها تقف عثرة في وجه تلاعبات مصنعي الأدوية.
وآخر يخترع موائد لرمضان تكلف المتبرعين أكثر من الإفطار في الشيراتون.
ومنهم، مثل ميرو والشرباتي، وقصة الغزل السوري، (يطقّها) شراكة مع أحد المفسدين من القطاع الخاص ويدعم شريكه بالقرارات على حساب البلد.

وفجأة ينتهي مفعول المهدئ، ونصحى لنجد خبر جديد عن تشكيل وزارة جديدة.
فما الذي ستفعله الوزارة الجديدة؟
أول مهام السادة الوزراء الجدد عادة" هو حقن وجوههم.........................

.....................الخ.