روح خيّط بغير هل المسلّة

أنا و من طول عمري ما بعرف كّون أصدقاء. الكل بيعتبرني عدوه.. أحياناً بتطّلع بالمراية و بقول لحالي: لعمى, ليش؟ معقول أنا الصح و الكل غلط؟ طيب حتى الطرفين بينسوا المشلكة و بينزلوا فيني.. بيقولوا عدو عدوّي صديقي. كيف ممكن لشخص أنو يكون على خلاف مع الطرفين في نزاع؟ على كل حال ممكن تعرفوا الجواب بعد نهاية هل التدوينة..

د بشّار الأسد: لأسباب عديدة جدّاً و ما رح حاججك إلّا بأبسطها و هو أنك عامل مسكين. اذا سلّمنا جدلاً بصحة النظريّة فأنت لست على قدر حمل الرّئاسة في سوريا و لذلك بقلّك: روح خيط بغير ها المسلّة.

رجب طيب أردوغان: شاطر بالكلام و الوعيد. يعني بصراحة متل النظام السوري. ووصلت المواصيل لعنّا و صرت جاهز أنت و نظامك للتدخل عسكريّاً في سوريا!! كنت حبّك و لكن كلشي بيناتنا انتهى لأنو سوريا صعبة عليك و مشاكلنا منحلّا بين بعض و بلا سلاحك و لذلك بقلّك: روح خيّط بغير ها المسلّة.

السيّد حسن نصر الله: رجل و اللي بقول غير هل الكلام غلطان. بس لا تنسى يا سيد أنَّ من يدعمك و يحتضن مقاومتك هو الشعب السوري و ليس النظام وحده. الشعب كان يحبك بكل طوائفه و أطيافه و لكن  عندما لا تترحم على قتلى الشعب و تسأل أين هم الشعب السوري و تحتكم لأجندة المصلحة الذاتية و الآنيّة بقلّك: روح خيّط بغير ها المسلّة.

الشيخ عدنان العرعور:

تترحم على الشهداء, مشكور. ترفع الدّعاء, مشكور. تقود الثورة و تفتي للناس و توجه التعليمات, كتير. تقول انّك مش طائفي و رسالتك بالحياة التشهير بالطوائف التي لا تتبع مذهبك, كتير. صديق برنامجك و زميل نضالك: زهير الصّديق صاحب دعوة قتل العلويين, كتير كتير.. أجندتك معروفة و هي محاربة ايران و حلفاءها لوقف ما يسمّى "المد الشيعي" و إن استدعى ذلك المتاجرة بدماء السوريين و لهيك بقلّك: روح خيّط بغير ها المسلّة.

روسيا و الصين: يلي بيشوفكن بيقول أخوات سوريا من غير أم. واقفين ضد التدخل الخارجي في سوريا, مشكورين. بس تقنعوني أنو ما رح تبيعوا مواقفكم لمّا بيدفعلكم الناتو أكثر؟ ما بسدّق. و لأنو المحبّة كذّابة و الأنظمة متشابهة و الأجندة مصلحة خاصة غير سوريّة بقلكم: روحوا خيّطوا بغير ها المسلّة.

السيد عبد الحليم خدّام: بالنسبة لمشاعرك الدافئة نحو الحركة الشعبيّة, شكراً. بس يعني آخر واحد بحقلّوا يحكي على النظام و الفساد. و لأنّك ما عرفت تحكي إلّا لمحطة اسرائيلية بقلّك: روح خيّط بغير ها المسلّة.

الأخوان المسلمين: للاختصار فقط و من أجل عدم الإطالة في التاريخ و الحاضر رح قلك يا سيّدعلي صدر الدين البيانوني و بعد مقابلتك مع التلفزيون الاسرائيلي متل ما قلت للسيد خدام: روح خيّط بغير ها المسلّة.

الموالي الشبّيح: الرجولة ما بالعنف و ما بإلغاء الآخر. سوريا بتساع الكل. و لأنّك شخص تحرّض على العنف و تعتقد أنّو بالعنف رح تخلص, بقلّك: روح خيّط بغير ها المسلّة.

المعارض الشبّيح: يعني وين المرجلة بالعنف و شو الفرق بينك و بين الموالي الشبّيح؟ ما بتعرف أنك بتشبيحك شرعنت عنف النّظام ضد يلّي الو علاقو و يلي مالو علاقة؟ (هي ع أساس النظام فارقة معو). ولأنو شكلك ما فهمت ليش الثورة سلميّة بقلّك: روح خيّط بغير ها المسلّة.

المعارض الذي يستجدي التدخّل العسكري الخارجي: معارض, حقّك. سوري, على عيني. بس تساهم بحرب على سوريا و أنت أو مرؤوسيك يلي قاعدين بقهاوي اوروبا, كتير. تصير أكذب من الاعلام السوري مشان تضغط باتجاه التدخّل الخارجي, كتير. تتجاهل الأمثلة الحيّة أمامك و أمام السوريين مثل العراق و ليبيا و لبنان, كتير كتير. و لأنك إما تتمتع بذاكرة السمكة أو أنك كذّاب كبيرو ما فارقة معك حياتي بقلّك: روح خيّط بغير ها المسلّة.

الموالي يلي عم يحضر قناة الدّنيا: بتشجّع الاعلام الوطني, مغدور. لسّا بتحبّو؟ معناها صار بدّك دكتور نفسي. بس لسّا تقلّي أنو مافي مظاهرات بالبلد و كل الناس يلي عم تطلع مسلّحين بقلّك: روح خيّط بغير ها المسلّة.

المعارض يلي عم يراهن ع انشقاق الجيش: بصراحة ما بعرف شو بدّي قلّك. يعني اذا انشق الجيش دخلنا بحرب أهليّة و أغلب التجارب التاريخية و المعاصرة بتقول انّو الانقلابات العسكرية بتوصّل لأنظمة ديكتاتوريّة أو حروب أهليّة. و لأنّك ضعيف بمادّة التاريخ بقلّك: روح خيّط بغير ها المسلّة.

الموالي يلي عم يقول "ما عطيتوه فرصة ليصلّح": غير إنّو كان معو 11 سنة يصلّح و بلا يتحجج بالضغوط الدوليّة و كان بلاها هل كام سفرة الاستجمام ع لندن و مدريد. و أنا بظن إنك شخصياً و بينك و بين حالك ما مقتنع بحكيك و لذلك بقلّك: روح خيّط بغير ها المسلّة.

و تطول القائمة و يتضخم بالمقابل عدد أعدائي..

بحب قلكم يا سوريين إنّو البلد أكبر من كل هدون يلي فوق و أكيد أكبر مني و منّك. و بحب كمان قلّكم انّو ما حدا إلا عندو أجندته الخاصّة و ما رايحة الا علينا يلي عايشين بها البلد. اذا ما قعدنا كلنا ع طاولة مستديرة و بلّشنا نفكر و نتناقش رح نخيّط حبل مشنقة البلد و لعنة على هالمسلّة..