شو كنت خسرت، سيادتك؟

الكاتب - صديق الجمرة: قاهر الدمعه 


كتير كتبوا لسيادتو على التويتر و على مدوناتهم و على الفيسبوك و على أساس أنو لربّما توصلوا الفكرة بطريقة أو بأخرى!! يعني ع أساس يلّي حوليه رح يوصلولوا!! ما هنن بالأصل سبب البلى بالبلد. 

و لكن مع الإيمان بإنو سيادتو بيعرف بالتكنولوجيا و ممكن يستخدم الكومبيوتر و ممكن يكون شوي نرجسي و يحاول يبحث في غوغل على اسمو بوقت فراغو و بالغلط يوصل على مدونتي أو زقزوقتي و يضّطلع على رسالتي إليه و على أمل ....

سيادتو

بقول لسيادتو شو كنت خسرت؟ 

لو عملت قانون أحزاب و دعيت كل مين اسموا معارض ينظّم حالو و يجي يدخل بالحوار شو كنت خسرت؟ ما أصلا المعارضة السورية بدها سنيين لحتى تصير منظمة و الها قاعدة شعبيّة لحتّى تربح بانتخابات تشريعيّة و خاصّة انو البعث -و على رغم أنو قرّب يدخل متحف الأفكار الفاشلة- مازال قوي تنظيميا في سوريا و قاعدته الشعبية غالبة.

لو عملت انتخابات رئاسيّة متعددة, شو كنت خسرت؟ ما أصلاً بتعرف أنو في ناس كتير "بتحبّك" و مستحيل تخسر و النّاس المعارضة بسوريا الها توجهات لا تعد و لا تحصى و يعني صعب كتير يلاقو شخصيّة وحدة يدعموها و حتى لو صار، مين هادا؟

فهمني شو كنت خسرت بس لو اشتغلت مشان البلد من جوّا قد ما "اشتغلت" فينا مشان البلد من برّا؟

يعني يا سيادتك, ضلّيت معنّد لحتى الناس صارت تكره بعضا.. ضلّيت تنق لحتى صار في شحن طائفي بالبلد.. ضلّت فضائياتك تسب شهداء الطرف التاني لحتّى الناس صارت تتابع قناة الوصال و صاروا يسمعوا لواحد متل العرعور.. ضلّوا جماعتك يقولوا عصابات مسلّحة و يبعتوا الشبيحة لحتّى صار عنجد في عصابات مسلحة.. لك لعمى صرنا عم نلجأ لتركيا و لبنان و علّقتوا الفلسطينية بالمخيمات، أصلا هنن بدون سبب بيعلقوا... 

أحيانا بحس أنو في ناس جوّا نظامك عم يشتغلوا ضدك و ضد النظام نفسو لأنو ادارة الأزمة فيه كتير من الغباء....

شو كنت خسرت؟ أنا بقلك شو كنت خسرت.. كنت خسرت شويّة سلطة و خسرت كره بعض الناس و بالمقابل ربحت محبتهم كلهم و أنا كنت بكون أول المنحبكجية و بنتخبك (بس ما بنتخب حزبك).

هلق بقلّك إنك خسرت حتى لو ظنّيت إنك ربحت مؤقتاً بالقوّة...

تفضّل لنشوف هلّق شو بدّك تساوى بالقرف يلي وصلتنا اليه...