عزيزي كاتب التقرير

لك لسا ما ملّيت مني؟ والله أنا منك ملّيت. لاحقني من وقت كنت طفل صغير، من وقت ما شكيتني للآنسة بالمدرسة لأني ما ردّدت الشعار الصباحي. من وقت ما فسدتني لإستاذ الفتوّة لأني ما كنت نفذ الأوامر العسكرية تبع استرح واستعد. من وقت ما شفتني واقف على الدور بالفرن وعم بهدل على شوفير المسؤول كيف بخرب الدور ورحت خبّرت صاحب الفرن اللي أصدر فيني قرار بمنع شراء الخبز من فرنو لأني عم نفّر الزباين. من وقت ما كنت بالجامعة وكنت قاعد وراي بالفحص وعم تنقل من راشيتّة ولمّا إجا المراقب رميتها تحتي وقلتلّو إنو أنا كنت عم إنقل منها وحرمتني دورتين امتحانيتين.  من وقت ما اشتكيت عليي إني عم احكي عن إهمال البلديات للمدن والوسخ اللي معبّي الدنيا وعاقبوني بأنو إدفع ضريبة نظافة عن كل الحارة. من وقت ما فتحت كشك صغير ارتزق منو وحضرتك وقفت معي وحكيت بالسياسة وأنا ما جاوبتك وتاني يوم إجو كسرولي كشكي وشحطوني شهرين يحققوا معي. من وقت ما بلشت الثورة وإنت تكتب فيني إني ما حطيت صورة الرئيس ولا أيدت النظام بهالأزمة وإني على الأغلب عم اتظاهر واهترت رجليي من الفلق. 
عزيزي كاتب التقرير اسمحلي قلك حل عني يا حقير! أنا ما بقى خايف من تقاريرك السخيفة وبقلك إني بكل مظاهرة عم طلع ودور عليك! اكتب على دفترك الرخيص أنو أنا ومعي الشعب نريد إسقاط النظام اللي أساسو عالم تافهين متلك!